చలాకీ చిన్నది, జాబిలిలా నవ్వింది, తీగలా మెరిసింది, జాతరలో కలిసింది,
గిలకలా ఘల్లంది, లొల్లి లొల్లి చేసింది, దగ్గరికి రమ్మంది, గిల్లి గిచ్చి పెట్టింది, మౌనమేల పదమంది,
మనసేమో పొమ్మంది, మాట మాత్రం విననంది, అయ్యబాబోయ్ సిగ్గంది, ఆహా! బుర్రంతా పాడయింది,
… దిల్లంతా పరేషాన్ చేసింది రా మావా!!! ….నాలోఉన్న నీతో ఏకమైన మనసుని అడుగు నువ్వంటే ఎంత ఇష్టమని,
క్షణమైనా నీ రూపు మరువలేని కనుపాపని అడుగు నిను విడచి ఉండటం ఎంత కష్టమని,
ఎప్పుడూ నిన్నే తలచే నా ఆలోచనని అడుగు నీకోసం ఎంత పరితపిస్తానని,
నీ ధ్యాసే ప్రేరణగా కదిలే గుండెచప్పుడుని అడుగు నీ చెలిమికై ఎంత తల్లడిల్లానని,
నీ కోసమే జీవిస్తూ వదిలే ప్రతి శ్వాసని అడుగు నీ రాకకై ఎంత ఎదురు చూస్తానని...
ఏ దేశంలోనైనా మనుగడ సాగించగలం, ఎవరితోనైనా సర్దుకుపోగలం , భిన్న వేషభాషలు అలవరచుకోగలం,కానీ మూస ధోరణికి భిన్నంగా మనమంటే ప్రత్యేక ముద్రవేసే సృజనాత్మకత కావాలి
టాటాల మొదలు, బిర్లా, మిట్టల్, అంబానీల వరకు ప్రపంచ ఆర్ధికస్థితినే శాసించగలిగే మేధావులు ఉన్నారు, కానీ నాణేనికి మరోవైపులా ఇంకా ఉన్న ఆకలి చావులను, ప్రాధమిక వైద్యం లేని ప్రదేశాలను రూపుమాపే మరో వందమంది మేధావులు రావాలి
మత్తగజము కంటే స్థిరమైన ఆర్ధిక స్థితిగల్గిన పలుప్రపంచదేశాలు ఆర్థికమాంద్యం వల్ల విలవిలలాడుతున్నా, భారత ఆర్ధిక స్థితిని సరైన మార్గంలో నడిపించే చాణక్యులు ఉన్నారు, కానీ ప్రపంచ ఆర్ధికస్థితి నీలినీడలు భారతావనిని ప్రభావితం చేసే పరిస్థితిని దూరంచేసే నవచాణక్యులు పుట్టాలి
ఏ దేశమేగినా, ఎందుకాలిడినా, పొగడరా నీ తల్లి భూమి భారతిని అన్నారు గురజాడ అప్పారావుగారు,ఈ సూత్రాన్ని తూ||చ|| తప్పకుండా పాటించి భారతీయ ఖ్యాతిని నలుదిక్కులా వ్యాపింపచేసిన భారతీయులకు ఈ ఘనత సొంతం,
కానీ ఈ నవతరంలో ఉరకలు వేసే యువతరం భారతీయ కీర్తిని ప్రపంచ దేశాలంతా దిక్కులు పిక్కటిల్లేలా కొనియాడే విధంగా కృషిచేయాలని కోరుకొంటున్నాడీ సగటు భారతీయుడు….
బోసినవ్వుల పాలబుగ్గల పసి పాపాయిని చూసి, ఇలాగే గడవాలి అనిపిస్తుంది జీవితాంతం
పున్నమి వెలుగుల జల్లులలో, కొసరి కొసరి గోరుముద్దలు పెట్టే అమ్మ ఒడిలో ఒదిగిపోవాలనిపిస్తుంది జీవితాంతం
బుడి బుడి నడకలతో తప్పటడుగులు వేస్తే, సరిదిద్దే నాన్న సంరక్షణ ఉండాలి జీవితాంతం
ఓనమాలు నేర్చుకొని చిట్టి పొట్టి మాటలు పలికితే సంబరపడే అమ్మానాన్నల ఆనందం కావాలి జీవితాంతం
విద్యాబుద్దులు నేర్పించి, క్రమశిక్షణ అలవరచి భవిష్యత్తుకు బంగారు బాటలు వేసిన అధ్యాపకుల ఆశీస్సులు తోడుండాలి జీవితాంతం
గెలుపు ఓటములలో వెన్నుతట్టి నిలిచి, మంచి చెడుల విచక్షణ తెలియజెప్పే మనసైన సహచరులు ఉండాలి జీవితాంతం
కొంటె కోణంగిలతో, చిలిపి చేష్టల్లో, సరదాగా సాగే ఉరకలు వేసే యవ్వనం ఉండే నూనూగుమీసాల వయస్సవ్వాలి జీవితాంతం
పట్టుదలతో ఉన్నత శిఖరాలను అధిరోహిస్తూ, పదుగురికి సాయపడుతూ, ఇంతింతై వటుడింతై ప్రపంచఖ్యాతి గడించే తపన ఉండాలి జీవితాంతం
నెమలిలోని హొయలు, కోయిలలోని మాధుర్యం, హంసలోని గుణం, జలకన్యలోని చురుకు కలగలిసిన మగువ తోడుకావాలి జీవితాంతం
మనసిచ్చిన మగువతో రసరమ్యభరితమైన రతిరాసక్రీడల్లో స్వర్గాన్ని తలపించే యవ్వనం సొంతమవ్వాలి జీవితాంతం
ఈ అంతంలేని జీవిత చక్రం ఏ కధకైనా ఓ మంచి సుఖాంతం .......
చీమలు దూరని చిట్టడవుంది, కాకులు దూరని కారడవుంది... కాని ప్రేమ దూరని మనసెందుకు లేదు?
మాటలు చెప్పే చిలకుంది, పాటలు పాడే కోయిలుంది… కాని మనసును తెలిపే ధైర్యం ఎందుకు లేదు?
సూర్యుడు తాకని చోటుంది, ఉరుములు లేని పిడుగుంది… కాని చలించని గుండె ఎందుకు లేదు?
కోర్కెలు లేని ప్రాణి ఉంది, వరాలివ్వని దేవత ఉంది… కాని స్వార్ధం లేని ప్రేమ ఎందుకు లేదు?
వరదలు రాని వాగే ఉంది, జల్లులు పడని స్థలమే ఉంది… కాని కన్నీళ్లు తెప్పించని ప్రేమ ఎందుకు లేదు?
ఓ ప్రేమా !! ఏమిటి నీ కులం ఏది నీ మతం
రాళ్ళనైనా కరిగించగలవు ఎలాటింది నీ గతం
ఇప్పటికీ అర్ధం కాలేదు ఏమిటో నీ అభిమతం
నీ గురించి ఎలా వ్యక్తపరచను నా మనోగతం
పలువిధాల భావసమ్మేలనం నీతో నా సహజీవితం
కుశాగ్ర బుద్ధివయ్ , దృఢ చిత్తముతో , లక్ష్యమే ఊపిరిగా, ఆకాశమే హద్దుగా, సాగిపో ఓ నేస్తం,
అపుడు కానరాని, గనలేని, ధరికిరాని, చేరుకొని, చేరలేని విషయం ఈ జగత్తులో ఏది లేదు.
